قصيدة | مصر ام الدنيا "وعجبي"
طمنى على مصر يا عم عبد العال / قالى مصر زي الفل وعال العال
قلتله والناس
قالى بيفطروا بيتزا وبيتعشوا حمام
قلتله والعيشه لساها مره
قالى دي الناس من الفرحه مش عاوزة تنام
قلتله يعني البلد حالها اتعدل
قالى طبعآ دي مفيهاش كلام
قلتله امال البلطجة والسرقة
قالى دة ابراهيم الابيض ودة شغل افلام
قلتله والشباب لاقي شغل ولا لسه بيدور
قالى قاعد بيعد فلوس من زمان
قلتله وابناء العاملين لسه بيعينوهم بالكوسة
قالى ده قانون ولاغيناه
قلتله طيب والواسطة والمحسوبية
قالى خلاص بقت ذكري
قلتله والكهرباء لسه بتقطع
قالى بالطاقة المتجددة جددنا
قلتله وانابيب الغاز
قالى بقت مواسير وبمحبس كمان
قلتله طيب والزباله فى الشوارع
قالى خلاص انزل دور صناديق فى كل شارع
قلتله ايه اخبار الخصخصة
ضحك و قالى خلاص كلها قطاع عام
قلتله طب والدعم
قالى مع التموين كل شهر ليك بلح الشام
قلتله واطفال الشوارع
قالى ملهمش غير الصنعة والعلام
قلتله والعشوائيات
قالى كلها بقت سراميك ورخام
قلتله صحيح جرام الدهب عامل كام
قالى جرام ايه دة الدهب بيتباع خام
قلتله طب علي كدة بقى ماتشوف لى عروسة
قالى خلاص مبقاش فى عنوسه كلها بقيت مدام
قلتله مصر اللى بتكلمنى عليها دي مصر أم الدنيا ولامصر أم الاحلام والاوهام ولا مصر كمان 100 سنة لقدام
سكت وقفل من غير حتى ما يقولى سلام
تابع جروب "وظائف الحكومية المصرية" على الفيس بوك
للمزيد من فرص العمل الحكومية والخاصة تابع اكبر صفحة نشر وظائف فى مصر على الفيس بوك
متابعة جميع الوظائف الحكومية لحظه بلحظه نزل الان تطبيق وظائف مصرية من سوق جوجل بلاي
